Search This Blog

Monday, December 30, 2013

ye hosh ke marhale hain................








meri raaten teher gaii haiN

mere din guzar gaye hain
ye hosh ke marhale hain
mil kar mukar gaye hain
sehemi khamoshiyon say
tufaan bhi dar gaye  hain
tera darr bandh kyon pada hai
bekhwab kitne peher gaye hain
herkat suna hai zindgi hai
ye herkat vo kar gaye hain
aakhir hasti ka namud kya hai
kitne ilzam iske sar gaye hain
jo chund saanson per tiki hai
us zindgi pe hum mar gaye hain

Saturday, December 21, 2013

ye azab khahishon ke.......................





ye azab khahishon ke
bhogne tou honge
khahishen bhi apni
derd bhi hain apne
sehne tou honge
yehin tamam honge faisle bhi
yehin pukarengi aahen
yehin khatam hongi raahen
yehi kasmakash rahegi
yehin chupke say dil jalenge
yehin raakh bhi udegi
yehin jism khaak honge
yehin rooh chaak hogi
ke yehin arzu phali thi
yehin dil ki dilagi thi
raah aur bhi mili thi
per yehi bhali lagi thi
lutf ka moqam bas yehi hai
yeh sarmastiyan gawah hain
inki umr do ghadi hai
do-rangi theen khahishen ye
ek rang takmil ki thi chahat
duja tha qudrat ki amanat
kyon na vo rang chuna tu ney
jis say teri zaat dhul gai thi
tere khwab sirf haseen they
taabir unki bas yehi thi
ek derd may duba hua dil
do ankhen khoon say tar
ye khoon hai khahishon ka
jinhen ye samjh may na aaya
rab jub saamne khada tha
kyon khahishon say dil lagaya

Friday, December 6, 2013

ek sach, ek soch....






sab say dil lagaya
ek dil say nahi lagaya
ye duniya mahaz tamasha
ye dil kyon na jaan paaya
her zubaan mukhtalif hai
jisey dil samajh paaye
koi vo baat kar na paaya
saath halaath her qadam hain
koi rishta saath ho na paaya
kehne ko her shaks mohabbat hai
per koi mohabbat kar na paaya
ye dil,.dil kyon padh raha hai
is sair-e-baatini say kya haath aaya
sadion say tha jo jamud taari
vo ek dil na tod paaya
maqtal say raah-o-rasam hai purani
bekaar hi vo zalim qaatil kehlaya
chala le, tu bhi teer-o-nashtar
is munjamid lahu ko koi na ched paaya
rooh tou azal say safar per hai apni
 is jism ka thikana rishte kehlaya
aaj lagta hai her ankh ajnabi hai
ek ajnabi say jub say dil lagaya

vo mil raha hai mujh say..................




vo mil raha hai mujh say
kitne chehre ajeeb le kar
vo hans raha hai mujh per
meri khahishon say mil kar
tu kar le hasraten apni puri
dekh kya mila in may kho kar
bas jaa tu kahin bhi jaa kar
jaana hai meri raahon say ho kar
aakhir in hison ko kya hua hai
kya mar gayeen tujh say juda ho kar
jub sulajh gayii hai her paheli
akhir kahan rah gaii hun kho kar
hui tanbeeh,tasdeeq-e-ishq ka ishara
tera nishan mila hai tujh say door ho kar

Thursday, November 21, 2013

dono jahaan ka faqat mohabbat hi naara hai .........................





Rab meherbaan hai hum bhi meherbaan hain
kya hua dushman hain magar vo insaan hain
agar gunah unke gintey ginti hum bhul jaate 
hum apni nadaanion pay khud pasheman hain
ghalath samjhe they jeet lenge duniya ulfat say
dil ke hukmaran jaane kyon ab tak shaitan hain
kabhi koi apna na ban paaya jisey bhi apnaya
shaayed  moqadar  zehen-o-dil ke tufaan hain
dono jahaan ka faqat mohabbat hi naara hai 
hamara bhi wahi dil hai hum bhi insaan hain
la-mehdood rab ki la mehdood mohabbat hai
hamaari siffat may bhi bas uske hi nishan hain
jo begaana-e-dil hain vo raaz-e-dil kya jaanen
hum deewane,deewane dilon ke mehmaan hain

Friday, November 8, 2013

meri soch ka ye daayera............................





meri soch ka ye daayera
apni shakal hai badal raha
khaali lakeer say kahin
apni haden yon phalangta
mujhe apne peeche pukarta
mai chali hun us ki taraf
uski hadon may khud ko baandhne
ya phir uski hadon ko thaamne
ke aakhir kahin usey rukna tou hai
mujh ko bhi kahin teherna tou hai
ankh micholi perde kahan uthayegi
bulbul ko kahan gul de paayegi
meri maan jaa mere daayere
apne asal say kabhi mujhe mila
tujhe tere karam ka waasta
mai thak gaii hun sochte sochte
tu mujh ko milega kis raaste
maine apne karam may dhunda tujhe
maine apne karam may paaya tujhe
teri aannkh khulti hai meri ankh may
mere azam hote warna khaak may
tera tabasum  hai tawanaai meri
tera hona hi hai raanaai meri
tera wajud hi hai mera daayera
jisey kabhi mai phalang na saki
ke hai abru ye nisbat ki teri
tujhi say zindgi hai zindgi meri

Wednesday, November 6, 2013

haqeeqat inaam ki.....................






phir khushi aai hai
unhi chor raston say
kotwal agarche apna hai
phir bhi daant khaai hai
koi hakim nahi hai rab sa
phir kaisi ye sunwaii hai
sab ku chahiye qimaten apni
apni qimat rab ne chukai hai
hai rab ka jawab-dah banda
phir kyon ye ungli uthai hai
haqeeqat inaam ki hai bas itni
pyaase ne pyaase ki pyaas bujhai hai


Friday, October 25, 2013

humen jinki hai tamanna.................





ye khauf hai humen ke
humen jinki hai tamanna
kabhi qareeb gar huye vo
mar na jaayen qurbaton say
jheley azab jinki furqaton ne 
jinki rifaqaton ke khwab dekhe
gar qismat say mil gaye vo
dar na jaayen tafawaton say
chund dinon say lag raha 
hum say kuch keh rahi hai 
koi serd saans sama-aton say
sadion say hai ye jung jaari
ye khauf hai agahi ki tayari
haasil na kar sako jisey tum
haqeeqatan vo manzil nahi hai
jo mila de mushkil kusha say
wahi raah tum say aa mili hai

Tuesday, October 22, 2013

Yaad






koi lamha nahi hai mera
magar mai faqat teri hun
bhula diya hai sab kuch
tujhe yaad kar rahi hun

Wednesday, October 2, 2013

Rishta







ek sauda tha dum bhar ka
ab jaan ka vo saudaii hai
jub tak jaan apni baaqi hai
vo jaan may apni baaqi hai
ab tak dil ye hairan hai
ab tak vo ek hairat hai
kaisa hai ye apna rishta
kya aisa koi rishta waqi hai
dil jis ka gawah ho jaaye
ek lamhe ki judaii na paaye
saanson ka zamin jo ho jaaye
usko bhala maut kaise aaye
ye rishta laa-saani kehlaaye

Friday, September 13, 2013

jaane mehefil may uski ab................................


Matlab parast bahut jahan may mile humen
matlab ki baat hum ko  samjha gaya hai vo
la-makaan ko khaali makan ki zeenat bana gaya
kya patta phir apna patta badal  gaya hai vo
ghair kaise kahun usey jisney apna mila diya
ek butt-kadey ko yon kaaba bana gaya hai vo
shaam-o-sehar se bekhabar ko ban ke rahbar
soye dilon ko jaagne ki wajah de gaya hai vo
yon tou tayyar hain azal say adam ke liye sabhi
is kathin safar ko mazeed asaan kar gaya hai vo
tassawur tareekiyon ka jub bhi sataaya kiya humen
chupke say yaad aa kar charaghaan kar gaya hai vo
jaane mehefil may uski ab ke kya hongi raunaqen 
ek shamma hamare dilon may bhi jala kar gaya hai vo

sab kuch rahega ek na rahega tu...........................





sach kehte they purane dilon ke log
sab kuch rahega, ek na rahega tu
duboyegi teri soch,tu kya raha hai soch
sab kuch bachega,ek na bach sakega tu
ladta hai kya zamaane say,inki na hi pooch
sab teri kahenge laikin,ek na keh sakega tu
kar apna tajzia,auron ki khaal na tu noch
her soz hai alag,ek na samajh sakega tu
zindaan hai zindagi,yon na isey kharoch
hain zanjeer khahishen,ek na paa sakega tu
teri zid hai asman ki,asmaan ki marzi to pooch
ye mitti ka safar hai,ek mutthi bhi na rahega tu

Thursday, August 22, 2013

shaayed kabhi usey ye patta na chal sake............





shaayed kabhi usey,ye patta na chal sake
hum kahan is shaayed ki zad say nikal sake
uski talaash aur apni justaju,kabhi na mil sake
mokhtar bekason ki duaon may na dhal sake
deewane kahan deewanon ko deewana kar sake
na koi aah hi nikal saki,na hi dil machal sake
kya daana-e-waqt ghafil ko hoshiyaar kar sake
kahan hai mauj vo, jo seenon may ubal sake
nabz azma-e-waqt ,na hi koi tadbeer kar sake
na mere haatim ghareeb ki,taqdeer badal sake
ek shoreedasar ki dastaan mukamal na kar sake
tumsa shaayed hi meherban koi humko mil sake

vo shaam jo guzar gaii..................





vo lau jo jul gaii 
phir kabhi na bujh saki
vo saza jo mil gaii
phir kabhi na tul saki
vo nazar jo mil gaii
phir nazar say na mil saki
vo dil may jo chub gaii
phir dil say na nikal sakii
vo raah jo muud gaii
phir kahin na chal saki
vo shaam jo guzar gaii
phir humko na mil saki

Wednesday, August 14, 2013

kahin ummid her sawera...................





kisi ko tashnagi gawara
kisi ko jaam ki talab hai
yehan her dil mokhtalif hai
aur her arzoo alag hai
kisi ko chah hai manzilon ki
kisi ko safar ki umang hai
kahin dasht zindagi hai
kahin zindagi malang hai
kahin ummid her sawera
kahin mayusion ki jung hai
kahin sawal ki hai hasrath
kahin sawal khud say tang hai
kahin serd jaan muntazar hai
kahin shola nawa dabang hai
kahin maqsood rahnuma hai
kahin raahbar uske sang hai

Thursday, July 25, 2013

ek khayal aksar khayalon may aa kar.......................




kabhi do ghadi muqabal huye tum
tou poochun mai tum say
is namkin paani ka akhir
tumko kaisa nasha hai
bair hai khaali ankhon say tumko
roz ek naya ghum thama dete ho inko 
darya burd karke hairan kyon ho
phir kinaare kinaare baithe muskura kar
poochte ho khamosh kyon ho
vo saghar jo khwabon may aakar
ek sehra ki anmit pyaas ko jaga kar
ankhon ko nazare ka mushda suna kar
ojhal hai kub say nazdeek aa kar
magar ehsaas ka her jharoka
maanus jhonkon ka aadi hai kub say
mehekta hai ek pal sisakta hai ek pal
ek khayal aksar khayalon may aa kar
kehta hai mujh say yehin per mila kar

Tuesday, July 2, 2013

Zindgi mai tou nibhaungi...................





Zindgi mai tou nibhaungi
koi saath de ya na de
mai tera suragh paaungi
hayaath gar maqsad na paayegi
phir mai ghar kaise jaaungi
ek zara tera hausla chahiye
warna perwaz say pehle thak jaaungi
meri bhatkanon may maujud hai wahi
inhi laghzishon may manzil paaungi
kisi roz hosh qayamat say na mila de
us say pehle mai tou doob jaaungi
maana khayaal ki umar daraaz hai
laikin mai kahaan wapas aaungi
zaad-e-safar abhi kuch na paas hai
ek dil hai vo yehin chod jaaungi
do ankhen sada meri nigraan hain
mai unki hi roshani kehlaaungi

Wednesday, June 26, 2013

khwab si us jheel per aksar......................




inhi baharon ke saaye may
kabhi koi matwala
apni berang duniya ko
aksar abaad karta tha
khwab si us jheel per aksar
apne khwab bunta tha
shadab shajar ke pehlu say lag kar
uski suprudgi may kho kar
apni mayusiyon per ro kar
vo khud ko bhalaya karta tha
daali daali jhuk kar ye kehti thi
deewane tera koi ho na ho 
mai tere dastaras may rehti thi
mujhe chu kar ehsaas tere saare
sandali hojaaya karte they
makhmali sabz nazare kehte they
hum sada teri ankhon may rehte they
tune jub dekha khwab hi dekha
ek nazar nawaz ki nazar say mil kar
phir teri nazar ne kya kya nahi dekha

Thursday, June 13, 2013

ye buundein............






baarish ki ye bunden
jaane konsa raag sunati hain
ye chum chum karta paani
jaane kis ke ghar say laati hain
ye shor machaate bheege payd
kehte hain ye tou purane saathi hain
ye pyaasi dharti say mil kar
ek naii mehak de jaati hain
in nhanni munni bundon say
humko pyaar bada hai laikin
jub ye milti hain num ankhon say
apna akaar bada kar jaati hain
aksar ye sawan ki raaten
in bundon ke sang beh jaati hain
koi dil pyaasa hai in bundon ka
kabhi ye pyaasi reh jaati hain
khaali ankhon may ye bunden
koi khwab puraana laati hain
aye kaash in bundon ke sang
kisi ko yaad hamari aati ho
baarish ki is tip tip say
koi baat hamaari sataati ho
maana ke tum badal ho hum mitti
ye baarish haq hamara yaad dilaati ho

Friday, May 31, 2013

Israar





kabhi aisa bhi ho saaqi
mai ban jaaun suraahi
mera kuch na rahe baaqi
mera shauq hojaaye perwana
bana daale mujhe shamma
phir karde mujh ko deewana
sitam ye ke sitam dar sitam chahe
dil ye kaisa karam chahe
ajab ehsaas hai is ulfat ka
her lamha apna bharam chahe
mai hun aur wahi zindan hai
ab na jism hai na jaan hai
kehne ko mera vo mehman hai
aakhir kya khahish-e-insan hai
ye israar pyaara hai laikin
ek tera khayal sahara hai laikin
teri khamoshi per guzara hai laikin
thaki dhadkan ye kehti hai
yehan koi nadi ab na behti hai
wahi jheel si hain ankhen
wahan ab koi aur rehti hai
aye baad-e-wafa sun le
is chilman ko na sarakne de
na is deewar ko girne de
is hasrat ko yon hi marne de
ye wahi zabt ki kahani hai
lub pyaase aur ankhon may paani hai
 mohabbat ki ye zeenat purani hai

Wednesday, May 22, 2013

teri khamoshi keh rahi hai...................





teri khamoshi ko maine
aaj ja ke samjha
us shor say kya haasil
jo raaton ki nind chiney
jo dil ka sakun lele
teri khamoshi keh rahi hai
mai khamosh kyon nahi hun
meri lum-taraaniaan dekho aakhir
mera hi azaar ban gaii hain
kahaan hai samaa-aten vo
jo kisi ko baseeraten dain
kahan hain baseeraten vo
jo jahaan-e-dil karen munawwar
sab ki zubaan mashghala hai
jo samjha zubaan ki haqeeqat
usey haqeeqatan kuch mila hai
ye wasf aali hai janab-e-aali
ye zarf waalon ko hi mila hai
gar khamoshi khal uthey tou
bolo vo jo khuda chahta hai
kaho nabi ne jo kaha hai
ke wahin rehmat-e-khuda hai
warna zubaan rahe hasrath
samjho khamoshi khuda ki raza hai
aaj jub bhed ye khula hai
najaane dil may ye kaisa khula hai
kaise hogi khaana-puri ye
kahan teri inayeton ka silsila hai
mere shore ko sada hi
teri khamoshi say gila raha hai
aaj mai ye keh rahi hun
teri is bolti khamoshi say 
meri mohabbat barmala hai

Thursday, May 16, 2013

Aaj azad hua hai dil................







Aaj azad hua hai dil
us ek shert puraani say
jo ek shaam ka waada thi
us unsuni unkahi kahaani say
derd  hain saughaat mohabbat ke
jo na sanmbhle ek deewani say
usey kya maar sakenge ghum
jo mar gaya ho teri gul-fishaani say
qayem hain saare rooh ke ye jalwey
ek terey honey ki nishaani say

Wednesday, May 15, 2013

Phir mujhe pukar tu...............................




phir mujhe pukar tu
meri pukaar ki hai ye arzoo
gar khamosh ho jaayega tu
na hoga phir ye alam-e-huu
tu karta jaa tere karam
ke kaar-e-khuda ka kaarinda hai tu
meri zaat ek sifar hi sahi
tere dum say hai iski abroo
mera sar hai ab amanat teri
na jhukne de kisi aur ke qadmon may tu
meri chahton say na tu dagmaga
yaad rakh faqat mohabbat ka markaz hai tu
chupa hai shikayeton may ulfat ka yaqeen
ke meri pukaar hi hai teri justaju
le na ab aur tu mera imtihaan 
ab aur taab dil ko nahi mere raahru
jub ehsaas jaan ke jaane ka ho
bhadak uth-ti hai aur tamannaon ki lau
sun tag-o-dudh teri rang laai hai
na hai ab koi hawas-e- rang-o-bu
vo hum-zaad jo sadion say sang tha
teri meher say hogaya hai mere rubaru
khud per jub nigah padi mere meherbaan
"jaane kyon" waan bhi nazar aaya hai tu

Saturday, May 4, 2013

aisa karam koi aaj tak na kar saka................





kaii dinon say jaan-e-jaan
mere khayal ka guzar 
meri gali say na ho saka
najaane konsi raah mud gaye
kisi mod per vo pal na teher saka
dil-e-shakista ki kya khaak arzoo
ek waar kaari jo na sah saka
meley mosamon ke hain lage huye
koi mosam mujhe le kar na badh saka
aakhir ye zindgani kya likhegi kahani
ek shah ghareeb ki jholi na bhar saka
mere karam na dekh apne sitam tu dekh
teri khamoshi ek dil na sah saka
mana ke khasiyet jazbon may chahiye
jiski chah thi vo na khaas kar saka
derd raat ka hai taaron ka tutna
chaand ka safar koi na kar saka
ajab hai hosh ki dawa hosh le udi
aisa karam koi aaj tak na kar saka
ek naam aaj bhi qalb-o-jigar may hai
safha-e-hasti say kabhi jo na mit saka
khair ho dil ki dekh uski be-basi
tere khayal say na azad ho saka

Monday, April 22, 2013

ye sang humne zaat per apni jo khaaye.................






ye salaakhen humne khud ghadi hain
ye deewaren hamare isharon per khadi hain
ye sang humne apni zaat per jo khaaye
ye hamaari nakurda gunahon ki jhadi hain
chalo acha hua sazaayen pehle say taye theen
warna hamari maangon say uski maangen badi hain
badi dair say haath aya hai khird ka daman
deewanon ki ankhen moqadar say kub ladi hain
maazi ki baazi pe chal gaya chaal haal apna
aur kal ke her ek pal say sherten judi hain
waade iraade khwab si tilsimati shaamen
kub say zindagi ka ihaata kiye khadi hain
jhulsa na dein tera pairahan serd aahen 
ye be aab ankhen kitna khud say ladi hain

Wednesday, April 17, 2013

Aaj phir uski khamoshi ney................




Aaj phir uski khamoshi ney
mujh say kuch kaha hai
Aaj phir deewangi ku
khud say gila hai
Aakhir kya hai yaqeen ki surat
kya mohabbat ko kabhi chehra mila hai
koi dil may kahan samaya
koi nazdik bhi na aaya
kyon phir riqabaton ka
ek laamatnaahi silsila hai
sargoshion may jo gunjta hai
meri her soch, sochta hai
jo mujh say na mil ke bhi mila hai
kyon hai phir ye be-qarari
kya dil ki lagi kabhi haari
gar zabt hai tou walwala hai
masaayeb zindgi ka rukan hain
in say ghabrana kaisa nadan
yehi tou admiyet ka sila hai
gul pal do pal ki mehek hain
yaad jub talak javidaan hai
her pal khila khila hai

Monday, April 8, 2013

Mera tu na khayaal kar............................





mera tu na khayaal kar
ke mai tere khayaal ki hun nafi
mere dost vo mai hi thi 
jisey chaha nahi tu ne kabhi
ek ehsaan tha tera iltifaat
karam hi tou thi teri nigah bhi
do pal ka dilasa tha vo waqt
pal do pal ki thi her khushi
mere khayaal ki hi chah thi
ye meri tujh say wabastagi
vo junun mahaz ek khwaab tha
ab her ehsaas lagta hai ajnabi
azmaish gar shert hai ishq ki
na yaad aa phir mushkil may bhi
koi dum nikal jaayega dum
phir na kehna,meri jaan gaii
sulag uthi hai ye khamoshi
shola hui shabnum ki tashnagi
sang-e-meel hai tera lafz lafz
meri saans saans hai teri agahi
maana ke bekaran hai tera jahaan
kabhi hum ko bhi yaad hi kar sahi
aisa na ho ke mai, mai na rahun
tu ho saamne, nazar na aaye koi
na bana ulfat ke tu daayerey
mushq ye kahin teherti hi nahi
jo luta rangon ke bazaar may
us rangrez ki aaj koi qeemat nahi

Friday, March 29, 2013

ek rang hai deewana..................




her subah milti hai
mosam ek naya le kar
her shaam dhalti hai
ek paigham naya de kar
nayaab raat ye kehti hai
mujh ko na  ganwa so kar
pal do pal ka mauqa hun
pachta na mujhe kho kar
khursheed bujha sa hai
pareshan hai tera ho kar
rifaqat rab ki agar chahe
dekh duniya pe zara ro kar
naaz nafs ke na utha nadaan
dekh apni rooh ka kabhi ho kar
ab ek rang hai deewana
tere jalwon ka asar le kar

Thursday, March 28, 2013

phir usne liya mera imtihaan..............



phir usne liya mera imtihaan
phir na samjha mujhe meherbaan
mai ne shayed na tha bolna
na tha raaz dil ka kholna
jo theen khahishen meri hi theen
saare zakham bhi faqat mere hi they
uski nazar may sab raah-e-gumrahaan
mai thi bas ek khahish-e-neem jaan
raaz khamoshi ka jub paa liya
jub her zakhm khud hi si liya
phir kyon chahta hai unki zubaan
kyon kiya ummid ka ek pal ziyaan
kahaan milteen mujhe vo samaa-aten
ban jaati jo be-zubaani ki zubaan
kabhi sun paati unki khamoshiyan
kaash ye junun le kabhi raah-e-faham
kabhi tuut bhi jaaye us ka bharam
mai saare naqaab dil ke noch lun
deewangi ka koi naya naam soch lun
phir hogi meri zameen na mera asmaan
phir rahungi mai na ye dono jahaan
Maula tu samjha raha hai kub say zindgi
Her arzu may chupi hai teri bandagi
Tu hi hai meri khahishon ki zuban
Tujh say hi hai meri ulfat ka jahan
Tera hona hi hai mere hone ka nishan
gar tu na hota phir Maula mai kahan

Friday, March 22, 2013

Mohabbat ek nagahani hai......................





Mohabbat ek nagahani hai
Mohabbat na koi kahani hai
Mohabbat sadion purani hai
Mohabbt lahu ki rawaani hai
Mohabbat adam say bhi pehle
Mohabbat noor-e-asmaani hai
Mohabbat hai rooh ka ansar
Mohabbat rab ki nishaani hai
Mohabbat imaan saadiq hai
Mohabbat looh-e-qurani hai
Mohabbat dastaan-e-sulaimani
Mohabbat seeshson ki zubani hai
Mohabbat siddiq ki zeenath hai
Mohabbat yaar ki jaan-fishaani hai
Mohabbat shamsheer-e-haidar hai
Mohabbat be-loos qurbani hai
Mohabbat Farooq ka tewar hai
Mohabbat Ghani ki hukmarani hai
Mohabbat ehsaan khuda ka hai
Mohabbat mehbub--e-do-jahaani hai
Mohabbat Mohammed ka sadqa hai
Mohabbat ashiqon ki shaadmani hai
Mohabbat ezaaz hai dilgiron ka
Mohabbat derd ki jawaani hai
Mohabbat insan ki fitrat hai
Mohabbat rab ki zu-fishani hai
Mohabbat nazaan apni qismat per
Mohabbat khuda ki meherbani hai
Mohabbat mehbub ki surat hai
Mohabbat her pal manaani hai

Thursday, March 14, 2013

ruposh hogaye gar mere khayaal ye..............





ruposh hogaye gar mere khayaal ye
kon jaan paayega hai kiska kamaal ye
------------------------------------------------------------
vo khana-badosh hai ya sarfarosh hai
ek  israar purana kub say khamosh hai
labada gada ka hai shahon ka bhes hai
uski her ada may jaanbazon ka josh hai
manzar nigahon ko ghair ka dikhaaye vo
vo dostaan-e-rehmat ka halqa bagosh hai
jisey panaah na mile sabar-o-qarar may
wahed thikaana unka ek uski aghosh hai
kaif uski khamoshi, masti hai us say agahi
maye hain khayaal ye,dil maye-farosh  hai

khwab-e pareshan dhalne do...................





Koi shab  zindgi  si  khilne do
Kisi subah say ankh milne do
khwab-e pareshan dhalne do
be-naam seher say nikalne do
shama si hasti ko pighalne  do
maati ka diya pal pal  jalne  do
zulmaton ko ankhen malne do
be-par tayer ko na sanbhalne do
apne deewane ki ek na chalne do
us bandh darwaze ko ab khulne do
apni gali say hum ko gale milne do

Saturday, March 9, 2013

kahin hai raat ka andhera................








kahin hai raat ka andhera
kahin hai phaila hua ujala
koi kahin din mana raha hai
koi kahin shab ko bhula raha hai
dono ki hasrath yehi hai
koi paighaam hum ko dede
koi paighaam hum say lele
kahin kisi ka waqt teher jaaye
kahin kisi ka waqt guzar jaaye
zehen-o-dil ki kofaton say
apne dil-o-dimaagh dho le
kahin koi nayab lafz kisi ka
kisi ki mayus rooh ko chu le
ek nerm taaza hawa ka jhonka
kisi khuli khidki ko tatoley
kahin koi jharoka koi jhuri mil jaaye
mai uski tamazaton ko sametun
saari veeraniyaan uda lun
wahi dost mera sadiyon purana
inhi khulavon may phir say paa lun
koi kub say khud may khojta hai
apni deewangi may dhundta hai
aye kaash hum, hum na hote
aur ye waqt ke sitam na hote
aaj bhi vo nhanni si gileheri
ab bhi pahad khojti hai
apna agla konsa hai thikana
apni qismat say poochti hai

Friday, March 8, 2013

ban gaya meri aadat vo..............





mere hisson ki herkat vo
ranj-o-ghum ki raahat vo
mere khayaal ki farhat vo
ban gaya meri aadat vo
vo hai tou mai hoti hun
us ek wajah ko jeeti hun
wahi ek khayaal piroti hun
her lamha us say milti hun
nayab hai ye rishta apna
maano jaise ho koi sapna
suna hai kya rab ka kehna
ab na door mujh say rehna

Thursday, March 7, 2013

tut-ta raha ek khwab raat bhar.................





jo paas tha sab tou gaya
tujhe aur kya sanam chahiye
khwab chahiye khayal chahiye
shabdon ki konsi qisam chahiye
hoshwaalon ki lun tarani chahiye
ya deewane ka bharam chahiye
pooch na us say hijr ki khushi
vasal may jise ghum chahiye
khamosh ko dua shor ki mili
aur konsa naya sitam chahiye
ye tapish kitnon ko jalaa gai
is aag ko tera karam chahiye
tut-ta raha ek khwab raat bhar
her raat tujhe kyon num chahiye
ek dil pe nashtar kitne chalayenge
unhen kuch tou sharam chahiye

Ghum na kar zindagi......................




Ghum na kar zindagi
tere saath bhi hai koi
tu dhadak rahi hai abhi
isi saaz say hai zindagi
gar ye nahi tou tu nahi
ek ehsaas hun mai tera
mujh say hai ye naghmagi
gar mai nahi tou tu nahi
koi phul hai khaar ka badan
koi khaar hai be-chaman
koi ghuncha hai be-watan
inhi say mili hum ko agahi
gar ye nahi tou kuch nahi
kaii ansaron ki amajagah
ye jasd-e-khaaki hai mera
ek jo duje say bichad gaya
koi pehchan ki raah bhi nahi
hujum gar kabhi daboch le
tere firaq ki raahen noch le
hogi ek naye safar ki ibtida
gar teher gaii tou kuch nahi

Wednesday, February 27, 2013

waqt ka ye carvan................





koi dil ki baat kyon kare
koi chahe jiye mare
waqt ka ye carvan
mujhe chod kar badh gaya
mai wahin khadi rahi
jahan tu mujh say bichad gaya
koi dil tak na pahunch saka
na nigahon ka bhed pa saka
sab bas apni khudi may hi rahe
koi khud ko na samajh saka
badi ajib hai ye zindgi
koi apna, apna na raha
hain mutaharik saaye jism ke
kahaan hai in may zindgi
kahaan miti rooh ki tashnagi
na jazbon may hai koi dilkashi
yehan sab hain ajnabi ajnabi
koi maangta hai jaan meri
kisi ko chahiye bas haaziri
ajab hai waqt ki behisi
rishton ki raanaai bhi gaii
lafzon ke teer hain itne kargar
batey deewar ke baghair bhi
jo they jism-o-jaan mere
vo bhi kub ke rukhsat huye
jinhen hukumaton ka shauq hai
fun dilon ko jeetne ka seekh len
maskhar na hosakegi jungon say ye
ajab hai ye dil ki zameen
koi pyaar say rakhde qadam
uske liye bich jaayegi wahin
ye nishaniyaan hain wahi
jub hoga koi kisi ka nahi
log apne saayon say khauf khayenge
tanha haath malte rah jaayenge
kar haqeeqat ka apni saamna
siwa rab ke kisi say na maangna
saath ho ya halaath hon
her surat may usi ko thaamna
pukaar aur arsh-e-anbareen
dono ka faasla hai bas ek jabeen
ye daur khud ko dohrayega
her daur paayega phir ek mubeen

Saturday, February 23, 2013

vo zindgi jo kabhi mujh may...............




zindagi jo kabhi mujh may hua karti thi
ab  door khadi mujh  pe hansa  karti hai
shaakh say gul aur chaman say bulbul ka
ek haseen  tallukh  yehi tou hua karti hai
kaha maujh ko tufan ne thama kar kashti
dekh le ye kis ki marzi pe chala karti hai
bayabaanon ko bhala kya ghum tanhai ka
zindagi in say hi apne israr kaha karti hai
waqt aur hasti ka sabab tha maalum kise
zindgi ek sarphire ka khwab jiya karti hai
ghaafil  taayer ki udaan  pal do pal hi sahi
isi perwaaz ka naam zindagi hua karti hai