zindgi pal ki udaan hai

Zindgi humne suna hai

Sada rawan dawan hai

Mai kaise maan lun

Aakhir zindgi kahan hai

Guzarey huye palon ki

Bhuli si dastaan hai

Ye daur kaunsa hai

ye kaunsa jahaan hai

Gum-naam saahilon sa

Be-naam-o-nishaan hai

Koi chaap keh rahi hai

Intizar bad-guman hai

Bojhal fiza ka aanchal

kashti ka baadbaan hai

shorish-e-mauj hai ishara

bas aane ko tufaan hai

be-khatar hain perwane

yehi raat unki aan hai

shamma ki roshni may

un lubon ki muskan hai

hai mahu-e-khwab kubse

khayaal-e-visaal-e-jaan hai

mehrab mehal hain mitti

zindgi pal ki udaan hai

Ye khamoshi gar baaten karti

Ye khamoshi gar baaten karti

shikwe saarey jhutey lagtey

sach agar kehne pe aatey

khud ko us ka aks hi paate

aaj bhi vo gunj hai meri

ye baat usey kaise bataatey

be-hisi ki ek chahdar odhey

phir mujhey samjhane aatey

Baaton wadon ki zanjeeron may

tilsim ko qaid na kar paatey

saara samaa tha ek haqeeqat

ek apne hi they ferzi naatey

sar se jub bhi sarki chadar

gidhon ko dekha hai mandlatey

andheron ki aadi hain ankhen

ujalon se ankh kaise milaatey

aakhir naam kitne badlega vo

ek naam hum le nahi paatey

kabhi haqeeqat kabhi fasana

hum us ko likh nahi paatey

pucha hai jub bhi us say

aakhir sach kyon nahi batlatey

uski khamoshi yehi kehti hai

jaante ho samjh nahi paatey

ek katehra hai ye jeevan

mulzim roz hain aate jaatey

Aye zindgi ab tujh may

Aye zindgi ab tujh may

vo baat hi kahaan hai

Ab aye asmaan tujh may

Kahaan koi kahkashan hai

Aye udaas raat tujh may

Koi karb neem jaan hai

Is sara-seemgi ke peechey

Koii khamosh sa tufaan hai

Tha jahan kirdaron ka mela

Ab kahaan vo dastaan hai

Her muskurahat ke peeche

Koi gharz hukmaraan hai

In lakdion ke gharon may

Ab kahaan koi makaan hai

Dekh Mosamon ki bewafaii

Hawa kub se pareshan hai

Hai her subah machinon si

Zindgi ab na-meherbaan hai

Shaamon ko tou dhalna hai

Waqt bhala rukta kahaan hai

Ek mai hi patharai nahi hun

Yehaan her koi chataan hai

phir ek shab teri yaad ban kar

phir ek shab teri yaad ban kar

saare lamhe khaaron se chun kar

ek ek gul se khushbu chura kar

kitne khoonin rangon may naha kar

saari sarphiri khahishon ko sula kar

chupke se kehti hai kaano may aa kar

mohabbat usey raas aaye wafa kar

dekh chalta hai vo daman bacha kar

riyaa-kaar milte hain perda gira kar

kitna kaha tha na khud se mila kar

khata-kaar ke liye na tu khataa kar

Aah!Roshan hua dil sab kuch jala kar

Aaine,ab na yon mujh per hansa kar

Rab mila hai usey dil may basa kar

Jinhen naaz hai

Wafa agar lafzon may samaati

Kitney danaavon ko lahu rulaati

Jinhen naaz hai wafaaon pe apni

Un per haqeeqat ke nashtar chalati

Mudaris bhul baithe hain sabaq apne

Dastur-e-tadris unhen samjhaane aati

Aye Khoob-tar talaash karne waalo

Tum may ye ranaaii kaise samaati

Mana wafa sab ko haasil nahi hai

ye aag deewanon ko nahi jalaati

bheegi ruton ki ghaayel hain aankhen

bhala naaz inke pagli kaise uthaati

jo maye mohabbat ki do ghunt piley

kahaan hosh may khud ko ye paati

mohabbat ka her lamha wafa hai

lafzon se kahaan ye maat khaati