mujhe yaqeen hai mere yaqeen ......

kabhi khayaal kar le koi sawaal
tum un ka ghum na manaya karo
mujhe yaqeen hai mere yaqeen 
mere guman may na aaya karo
jisey paaya dono jahan haar kar
usey pal may na ganwaya  karo
mai farsh aur arash ki hun kadi
mujhe khayaal,na uljhaaya karo
mai jaanti hun khula meri zaat ke
apne daman taley na chupaya karo
zabt ki manzilein abhi door hain
imtihaan may waqt na zaaya karo
khayal khamoshion ki hi goonj hai
inhein apne naam se bulaaya karo

mai yaad hun aaungi gar bulaoge...................

mujhe bhula kar bhi na bhulaoge
mai yaad hun aaungi gar bulaoge
meri kashmakash ka ho raaz tum
bujh hi loongi gar tum bujhaaoge
mere yaqeen ko ab to de do hawa 
mere gumaan ko kub talak sulaoge
soch kehti hai  tum soch  ho meri
tum  hi mujh ko mujh se milaoge
jub talak baaqi hain hosh ye mere
sochti hun kahin  to mil hi jaaoge
Is deewngi per gar ho jaaye karam
in sawalon  se tum nikal  hi aaoge
thake thake say lamhe kehte hain
her haal may apna waada nibhaoge

Ek baar phir mujhe....

Ek baar phir mujhe

Usi safar pe lay chalo

Jahan her shaye khumar thi

Jahan ankh dil may shumaar thi

Na dahan zer-e-baar-e-kalaam they

Na dil ke pyaam nashar-e-aam they

Na chasm talab-e-iltifaat ki thi mutmani

Na tha malaal koi bujh le na ye unsuni

Bas rubaru tha Ek jalwa khaira kun

Dil sun raha tha uski dilnasheen dhun

Lafz samaaton ka safar kar hi na sake

Hissein aaj tak apni maut mar hi na sake

Aisa samaa kabhi aam ho hi na saka

Ye lamha sab ke liye jaam ho hi na saka

Bada baa kamaal tha mil kar nahi mila

Darmyan deewar thi,aur jaari tha silsila

Ek aaina rubaru tha jaise shab-o-roz

Khud apna deedaar tha kitna jaan soz

Ghusl-e-sehath paa gaieen rooh ki aziyetein

Mukammal kar gaieen Ye dar perda sohabatein

Tha ek khayaali jugnu......

Ek khayali jugnu ka taqab tha

Dasht bhi kitna pyara pyara tha

Umr tamam hui shab bhar may

Dil bas ek khwab ka maara tha

Ghadiyon ka hisab ab kon rakhe

Jub unhi ghadion per guzara tha

Rooh sarshaar thi uski sohbat may

Her lamhe ne khud ko nakaara tha

Aah! Dum bhar may duniya ojhal thi

Khamoshi may bhi usi ka naara tha

Tamaam hasti pe muhit thi uski hasti 

Ek dil ke siwa sab kuch hamara tha

Akhir jaanan ye alam konsa alam hai

marna mera kya ji uthna dobara tha

Kaash tere aage zubaan hojaun mai

Tera qurb ka her pal ek ishara tha

Teri ranaii salb kare leti hai tawanai

Phir koi hosh kahan koi yaara tha

Teri haqeeqat khuda jaane ya deewane

Tere siwa dil ka kahan koi chara tha