Ye bhi ek daur hai

Ye bhi ek daur hai

Ye bhi guzar jaayega

Ye mast kharamaan waqt

Apni chaal badal jaayega

Is jism ka her ansar

Qatra qatra pighal jaayega

Be-khwaab in raaton say

Her khwaab nikal jaayega

rang badalte chehron ka

ek aur rang dhal jaayega

zakhm puraane kehte hain

Naya her derd behal jaayega

Zindgi ek musafir ka quba

musafir chola badal jaayega

mai ek haqeeqat hun abhi

mujh per bhi ye kal aayega

Ye Dewanon ke khugar hain

Yaadon ke khaakon may

Aaj bhi chund taaza rang

naqsh-e-faryaadi ban kar

sana-kaari ka mazhar hain

ek be-rang si zindgani ka

ek az sar-e-nau jawaani ka

ek naii dil-kash kahani ka

ye khayal pas manzar hain

inhi se udhar dilkashi le kar

sajte hain khwab ye mosam

khahishon ke safar per in ki

udanen be-baal-o-par hain

kabhi hosh ke dushman ye

kabhi maikash ka pyala ye

kabhi pyaase ka dilasa ye

ye dewanon ke khugar hain

Guzre mosamon ki

Guzre mosamon ki

Saughaat naii le kar

Phir lo aagaye hain

Wahi qafiley bahaar ke

Veeraan gulshanon ko

Mil gaye hain ishaare

Hum hain tumharey

Wahi Saathi pyaar ke

Na ahad hai wapsi ka

Na ummid ka safar hai

Phir bhi humsafar hain

Wahi saaye etebaar ke

Derd Saahilon ka purana

Darya apne safar ka aadi

Tufaan ke maajhion se

wahi naate dulaar ke

her lamha naii kahani

deewanon ki eksi zindgani

ishq aur bekhudi ke

wahi rishte khumaar ke

Mai ishq ki surat hun zarur

Ya sada thi ek khayal ki

Ek khayaal ki thi ibtida

Khayaal hi khayaal may

Taraash liya ek dilruba

Ab zamaane se kya kahun

Khayaal ko tu kaise mila

Raaz-e-haq jaanta nahi koi

Izhaar usi se hua tha barmala

Mai ishq ki surat hun zarur

Mai hun niyaton ka sila

Mera aks tera khayaal hai

Tera Dil hoga meri sada

Qaasid hun tera pyaam hun

Tera lafz lafz meri dua

Ajib dastaan hai ye zindgi

Her arzu may khuda mila

Jub khayaal rubaru hogaya

Phir koii perda na raha

Aain qudrat ke ek rukn ka

Mera sukhan hai silsila

Tu Hi Mera Ghurur Hai

ye raat ka fusun hai ke

Udaas shaam ka qusur hai

Ye dil ki baat hai dilruba

Kahin tera khayal zarur hai

Tu moqam hai mai haal hun

Mera kaif tera shaoor hai

Mai abhi mahu-e-khayaal hun

Tu saheb-e-huzur hai

Mai ek bhatakti shama

Tu dayaar-e-noor hai

Meri roshnion ka raaz tu

Tere dam se mera zahur hai

sab ne bas dekha tujhey

Duniya ka ye hi dastoor hai

Najaane kyon hai yaqeen

Tere bhes may koi aur hai

Haala hun mai hai chaand tu

Tu hi mera ghurur hai

Nasib karde...................

Ab tou nasib karde tera dayaar bhi

Jaanti hun rehta hai tu is paar bhi

bhatkta hai maqsud manzil se pehle

Laazim hai khud ko kare sangsar bhi

beshak wahi hai her taareef ke qaabil

Usey marghub hai bande ki takrar bhi

Azal se insaan ne insanon ki,ki tijarat

Aao karen aam admiyet ka karobar bhi

Mehbub hi,mohabbat hai haqeeqat hai

mohabat jahaan,wahin jalwa-e-yaar bhi

kahan samjha hai koi khilafat ki zarurat

afu ke aage kya hain tegh-o-talwar bhi

khahish-e-qurb hi gar wahed ho tamanna

Haazri se pehle karo khud ko tayaar bhi

Vo chahe tou mushkilon ko karde masiha

Sar-nigun hojaayen pal may aghyaar bhi

Taghayur-e-qalb se haasil ummid hogaii

Ab shaamil-e-haal hai raza-e-yaar bhi

Ab kis liye hijaab hai

Subah sa ek khayaal hai

Shaam mahaz khwaab hai

Raat jaise koii saraab hai

Zindgi ki gardishon may

Ab Na koii mahtaab hai

Tapish si hai chaar-su

Seenon may inqlaab hai

nazar chura rahey hain sab

Aainon se hi ijtinaab hai

Hai Na darmyaan Koii nadi

Be-patwar Kashti be-aab hai

In sozishon se puch le

Inki chahat ab bhi aftaab hai

Be-perda hogaii kiran kiran

Ab kis liye hijaab hai

hain jo sawaal be-zubaan

unhi may her jawaab hai

Tera gada-e-be-nawa per

meher-o-karam be-hisaab hai

Sar hi kya dar per tere

Anmol ek ek gulaab hai

Kabhi tou khud ko Araam de

Mere dost mere humnawa

Aaj derd saarey bhul jaa

Kabhi tou khud ko araam de

Kabhi tou le furqaton ka maza

Ye subahen teri kyon udaas hain

Inki Bechainion ko kar widaa

Pal pal tujh per ye azaab kya

Ye raaten hain ke maatam-kada

Ye kisi aur ke khwab hain

Her aah may kis ki hai iltija

Aaj bhi wahi gharz hai hukmaran

khudgharz se kabhi na dil laga

kahaan koii samjh paaya hai ye

ulfat ka jahaan se kya waasta

hum aam, zindgaani apni aam si

tujh se khaas ka khaas hai martaba

khahishon ka basher ghulaam hai

teri saadgi se usey hai gila

musibaten bhi deti hain sakun

mohabbaton may jub hota hai khuda

na badal sakega tu mosamon ka mizaj

in may azal se admi ki hai ada

ye zakhm nahi,hain tamgha-e-wafa

her qatra lahu ka ban gaya hai dua

tu akela nahi derd ke is safar may

tere hamraah ek carvaan-e-ulfat hua

Mere Dost Sun

Mere Dost sun

zindgi chahati hai kya

Tujh sa ek rahbar

Tujh sa koii dilruba

Derd gar tu ban gaya

Phir kaun derd ki dava

Mere derd jub jub mile

Teri udasion se humnasheen

Derd saare apne bhul kar

Maine maangi tere liye dua

Koii tamanna gar zid kare

Koii aarzu gar machal uthey

Yaad karna, mere shab-o-roz,

Hasrathon ka na dam ghutey

Chund roz zindgi hai chaman

Kaif tanhaii ,seher hai sukhan

Apne saathi wahi ranj-o-alam

Kahaan tanha hain derd aur hum

zindgi amanath hai kisi aur ki

Aa Ummid ban jayen naye daur ki

Adaab-e-bandgi bas yehi kahe

Bandon se ulfat bandgi rahe

Mere Khuda

Mere khuda rehna sada

Hum per yon hi meherban

be-aasraon ka mere khuda

tere siwa kaun hai saaybaan

Mere shab-o-roz they eksaan

Khaali jism be-rooh neem jaan

Meri himmaton ka badha carvan

Mere hauslon may hogaya tu rawaan

Mera her azm hogaya phir jawaan

kis aah ka jaane vo jawab tha

Unke aastaan may tu be-hijaab tha

Ye tera karam nahi tou kya

Jahaan khwaja mile,mile Mustafa

Had-e-inayet mil jaaye jub khuda

Mera sar aur teri zameen

Teri mohabbat sab se haseen

Mere khuda tu kahaan nahin

Mere derd may mere chain may

Tu la-makaan, qaab-o-qausain may

Her basher tera jalwanumaa

Gar tu nahi tou hum kahaan

Tu hi wahed adam ki panaah

Tu hi donon aalam ki hamd-o-sanaa

Aye ghum-e-be-karaan

Aye ghum-e-be-karaan

Tu kahaan nahi,Kahaan nahi

Na ho pareshaan meri ghazal

Nazm na bigad jaaye kahin

Zabt-o-jazb ka hi riwaaj ho

Phir kahin jazbon ki meraaj ho

Ek mauqa hojaaye gar atta

Phir khayaal paaleta hai khuda

Aye udaas rutt teri qasam

Maine bhula diye ranj-o-ghum

Inhi may khushi ke raaz hain

Soz-o-Saaz ek hi andaaz hain

Kabhi guzro kisi derd ki shaam se

Dekhna hojayenge derd apne aam se

Sadion se zindgi ka yehi hai chalan

Ye kabhi khaar hai kabhi chaman

Mai kahin nahin ,tu hai ku ba ku

Maalik rahe tera karam aur meri “hu’

Chehre aks roohon ka

Chehre aks roohon ka

Aksar hua nahi kartey

gar haqeqat samjh letey

log chehron per nahi martey

Tajdeed-e-mohabbat ke liye janaan

Tajdeed-e-mohabbat ke liye jaanan

apna milna zaruri hai

Dekho Hosakta hai jaanan

Kabhi mujh ko bhula baitho

Yehi meeraas hai bas apni

Chund lamhe qayaamat ke

Koii shab ghum-e-mohabbat ki,

Ek seher-e-ummid inayet ki

Tumhen yaad ho ke na ho,

Meri yaad faqat tum ho

Meri manzil ka sahara tum,

Her tufaan ka kinara tum

hasrath ko bade shauq se paala

Her khwaab adhura jhela

Phir bhi na shikayet ki,

Yehi rasam mohabbat ki

Tum dhundloge bahaane sab,

Baat moqadar ki bhi karoge ab

Kabhi waqt junun jo tha,

Kya koii guman tha ke fusun tha

Maazi ko haal bana daala,

Her khauf dil se mita daala,

Beemaar ke liye janaan,

Kya Ab tak na mila shaafi

Tahrik-e-mohabbat ke liye janaan,

kyon ek dil na hua kaafi

Aks jo bhi sawaali honge,

Tumhen apna patta denge

tutey dil ki sada kya hai,

tumhen itna tou bata denge

kahaan ab humse deewane

Umr kuch is tarha

Huii basar apni

Na thi kisi ki khabar

Na rahi khabar apni

ajab dil ke mosam they

ajab thi dagar apni

Apni zindgi kub thi

sab ki rahii magar apni

waqt ke taqazon per

kahan hui guzar apni

ajab moqam hai ashiqi

wahin hogaii basar apni

hotey be-khudi ke qaayel

hoti khudi agar apni

jiske aage jukh gaya dil

usi ne ki qadar apni

maikash aur mayekhane

unme kahaan lehar apni

kahaan ab humse deewane

kahan paai sab ne nazar apni