ye waqt waqt ki baat hai.....................

ye waqt waqt ki baat hai
kal jo waqt tha mera
vo ab na mere saath hai
jub kabhi nazar teri taraf uthi
pal vo ankh se chalak uthey
khayaal tera khayaal na paa sake
qarar dava khud apni bante rahe
derd saare ek naya rang odh kar
khud apna darman khojte rahe
ye silsila umar bhar ki saughath hai
tu ho na ho ye mere saath hai
magar najaane kyon mere habib
ek khayal mujhe khud may lapet kar
kehta hai dekh zara ankhein moondh kar
mai aage hun waqt se bhi ek qadam
mai ojhal hun magar tere saath hun
awaz hun waqt ki,mai teri najath hun
rab ne tujhe sonpa hai apna muddua
talluq tera ban gaya mere liye dua

Mohabbat kum nahi hogi...............

chahe zamaana na hum ko yaad karta ho

chahe tassawur pe apne koi na marta ho

chahe apni gali se khayaal koi na guzarta ho

chahe hamare sang aahein koi na bharta ho

magar itna yaqeen aaj bhi hai dil ko,aye dil

apni mohabbat si mohabbat kum nahi hogi

agar waqt ka darya tez-aab hai to rahane de

sim gawaara hai ab musalsal firaaq rahane de

andhiyon ko sunnatton may lipta hi rahane de

dhadakti haqeeqat abhi seene may rahane de

dum todti hui fizaaon ko boojhne se kya haasil

haqeeqat ashna hai dil mohabbat kum nahi hogi

ungli thaam kar karliya paar darya wafavon ka

dil tou sada aadi tha khud apni hi sadaavon ka

us ke dar per aye dil kya kaam tha nigahon ka

dil sama-aat,dil baseearath gawah dono jahanon ka
tere jalwon se khaira mujasm noor hairan rahi hasti
do-alam may hai elaan,teri mohabbat kum nahi hogi

Aaj jal uthey kitne bujhe huye chiragh..........

ujalaon se mil paati nahi ankhein

ab sunta nahi dil apni bhi baatein

koi junun ab pareshan nahi karta

khayaal  ab koi aahein nahi bharta 

-------------------------------------------
aaj jal uthey kitne bujhe huye chiragh
aaj be-khwabiyon ka mil raha hai suraagh
jo bhi daastaan thi ishq ki, pasheman thi
kal kyon na paa-saki, jo mil raha hai aaj

hasti ke sab zakham muskura ke keh uthey

tujhe bhasam kar gaii,teri lagaii hui hi aag

mujhe usne nawaz kar,nawazish bana diya

batney ki arzoo may faiz tera raha hai jaag

jaan-o-dil ki aziyetein huyeen tamaam,aye azeez

maatam aqal ka ho to ho,uske peeche tu na bhaag

haasil yehi kahe, vo bhi tere liye, ye bhi tere liye

tera daur ye kahe,rabb-e-kareem ne sunli teri laag

tere jalwon ko nigahon may teher jaane de..................

mere hosh ke paimanon may uter jaane de
tere jalwon ko nigahon may teher jaane de

manzar phir ek baar nigahon se guzar jaane de
tere dar ki fizaon may dil ko sanwar jaane de

kitna maanus hai tere qurb ka ehsaas mere khuda
mere rag-o-jaan may lahu ban ke uter jaane de

ek pal bhi na ojhal ho teri azmat ka jaah-o-jalaal
be-sabaat hasti ko meri is pal tu nikhar jaane de

Apne mehbub ke ishq ko banaya jub miskin tu ne
mera qalb kahe, mujh ko mere ishq ke ghar jaane de

dono haathon se butta karti ho rahmat jis dar per
us dar-e-ezaaz ka kan kan mujh may bikher jaane de

yarab abhi jaari hai tere dar per mere hisson ka safar 
mere shab-o-roz teri galiyon may guzar jaane de

Had-e-nazar tak bas tu hi tu hai.....

ye raat aur timtimate  sitaare

diye se jul uthey hain saare

ye khilwaton ki mehefil

ye andheron may jhilmil

muddaton se maand jo pade they

unhi khwabon ka lagte hain haasil

had-e-nazar tak bas tu hi tu hai

meri khahishon ki purani arzoo hai

meley se lagay huye hain dil may

ye sakut bol utha hai mere dil may

unko sunna chahte ho tou aao

is duniya ki bheed se nikal kay

charon taraf jub ho"huu"ka alam

faham aur dil milte hain baham

insan taqleed ka hai sada se aadi

dosto,suno kabhi dil ki manadi 

raaz asliyet ke uthayenge perde

jo khud se mila de aisa peher de

sakun ka seher pursakun hai jitna

khuda aur bande ka talluq hai itna

koii aur uske siwa na humqadam hai

sab usi ke aur ek wahi humdum hai

is siyah raat ki qasam tanha nahi hum

khushian hain uski usi ke sabhi ghum

karro-bayan may mera rahbar chupa hai

usi ka karam ye mohabbaton ka silsila hai

Ye zindagi usi ki hai....

tujhe tou sab patta hai

mere saath kya hua hai

maula tera hi faisla hai

ilzaam kisi ke sar gaya hai

teri zaat may jo chupa hai

wahi adam ka martaba hai

isme adam ki kya khata hai

perda tere hukum se gira hai

ye teri chahat nahi tou kya hai

ban kar koi iblis nikal gaya hai

hawwa ki laghzish may kya naya hai

adam may tera ishq hi chupa hai

azmaya de kar,darvesh ko sadar-e-dil bhi

veeranon may warna husn kya dhara hai

teri pehchan ka sira faham ko mil gaya hai

ab kya ishq kya junun inme kya rakha hai

mamla dilon ka maula, teri rasa kashi hai

is tana tani may muft banda mar raha hai

karam bhi tere sitam bhi,ilzam ye kya hai

akhir bhale bure ki,kya tafreeq kya jama hai

ye aane jaane ka maula kheil tune kya racha hai

mohabbat ki fasal bo kar,kaatne ki kya saza hai

tune mitti may boye adam, mitti se hi ghadey bhi 

khushiyan ka iwaz ye, de kar lene ki kya ada hai

andaz teri hikmaton ke libada odh kar mile hain

pareshan faham,nafs nadan,shikar hote rahe hain

mulzim, mazlum ke dayere ilzam se nikal gaye hain

ke faisle dono taraf ke yarab,tu ne hi tou kiye hain

raaz teri qurbaton ka paa liya hai maine.....

kitne dinon ke baad zindagi mili hai
shab-e-intizar per naii seher khili hai
-----------------------------------------------------
raaz bandagi ka ab khula hai khird per
azal se humsafar they tere hi charagarh
barson sar jhuka kar tahi damani pe roye
umar bhar zindagi ne khaar duniya ke boye
ab ke haath aaye tujhe paane ke qareene
ab jaa ke paaya hai sajdon ko jabeen ne
raaz teri qurbaton ka paa liya hai maine
Her surat teri surat bana daali hai tune
ghalthan rahe sada ghairon ke tajziye may
khud per nazar padi,lage hain Ansoo peene 
maula teri rahmat qareeb thi kitni dilon se
gerdan zara jhukate paa jaate hum safeene 
gar tu meherbaan hai her ankh dostaan hai
ek tere karam se hi,apna yehan nishaan hai
teri hi sohabatein majaz may theen payein
Hain khana-e-dil may tere ishq ki  adayein
ghum-e-hijiran ka daras,tha marifat ka aayin
vavela machahte huye dil bhi hogaye shaheen
tu mil gaya jise,gerdab may rahbar ki surat
us deewane ko na patwar ki na saahil ki zarurat
sadiyon ki musafat taye kar li ek jast laga kar
tu ne kya kya nahi samjhaya bande ko jaga kar

umar ka her khwab zyaan hai..........

waqt ka darya rawan dwan hai

umar ka  her khwab zyaan hai

zeest ka haasil yehan kahan hai

qyas-o-khayal may dooba jahan hai

haqeeqat uski ain-ul-haq zaman hai

teri haqeeqat sirf uska bayaan hai

jaan meri tu bhi uski hi jaan hai

merzi per teri kuch bhi tika kahan hai

Tera her shikwa,shikwa-kinan hai

Kaash ke seene may, dil-e-nadan hai

na bhul taalib,ye kis ka makan hai

qabze may us ke ye dil ye jaan hai

teri soch aur talab ke darmyan hai

vo tere her her ansar say ayaan hai

ye husn ye paikar, tera kahan hai

bande,ye noor uska tera nishaan hai

Taareef us khuda ki jisne hume banaya......

Vo samajhte hain mujhe deewana bana denge 
Mera khayal hai ye bheys khud maine liya hai
----------------------------------------------------------
paaye they khaar gul,gulcheen ka soch kar
khuda ne gulcheen ko hi baghbaan kar diya
------------------------------------------------------------

Shaatir lubon ki thi Ajab vo muskurahat
Jaise sar kar liya ho,meyrka  zindagi ka
Deewanon Ne jaan kar haari thi zindagi
Kya le jayega koi,is nafrat ki daud may 
Ulfat ka ek ghunt kabhi pi kar tou dekhta
Jo teer khaaye hain zeher May bujhe huye
Lamha lamha tabeeb tha jo dhaal ban gaya
Kyon dhundta hai choton se rista hua lahu 
In zakhmon ki aanch se kabhi dil apna sekta 
Teri hasrath yehi sahi meri arzoo ka khoon 
Meri arzoo yehi kabhi tu mujhe ji ke dekhta
Akhir humnafas dawa kya hai tere sakun ki
Pooch dil se,kya hosaka kabhi rab se rabta 
Khatir jama rakh mai teri dastaras May hun
Mai na-ummid nahi hun tera mera ek raasta
Tu Ji bhar ke mana jashan apni jeet haar ka
Dekh tere karam hain kitne hawaas-bakhta 
Umar cut gaii tere is haar jeet k kheyl may
Koi dum ji tou le asal,ye ghum hai khud-sakhta 
Meri nazar se mila nazar, tera waan nahi guzar 
ye mohabbat ka hai nagar, mehbub ka hai patta

mujh se pehle mujh ko suna karta hai.................

mere in be tarteeb khayalon ka

bhataktii soch aur sawaalon ka

akhir koi na koi tou sabab hoga 

muddat se dil per na hui dastak 

sehra be-aab-bayaban si kasak

akhir koi na koi tou sabab hoga

siyah raat ko noor ki jaise talaash

ek naii subah ek naya roop tarash

akhir in halath ka koi matlab hoga

mujh se pehle mujh ko suna  karte hai

Baat meri mujh se pehle kaha karte hai

akhir in inayaat ka koi matlab hoga

aye rooh-e-khayaal aye ishq-e-mohal

hai ye tera karam hai ye tera kamaal

akhir in jalwon ka koi tou sabab hoga

ayin sadat hai khayaal ki ye mashaal

Rang laaya hai teri  mohabbat ka gulaal 

Izhar-e-karam her dum ba-adab hoga

Ek Pehra.....

ek pehra dil per her waqt rahta hai
Dayera nahi hai dastaar kehta hai

her roz uzar ek naya dhund hi lega

ye dil bada ayar hai tayaar rehta hai
Sadiyon sadaf may rah kar hua tayar
Pal may kahan gale ka haar hota hai

Kahan jayega taayer daam may aa kar
Perwaz se behter ye lalazar kehta  hai
Ye hawa mahal hai dhay jaayega ek din
is khwab may her koi khwaar hota hai
Ek umar ganwa kar raaz dil ne paaya hai
Zindagi ka saamna  bas  ek baar hota hai

behne de palkon se.........................

umar ka dhoka na de mujh ko deewane
ke umar hai dhoka dil kyon nahi maane
jo baat dil ki hai dil hi may na reh jaaye
shauoor se  poocha vo  bhi  nahi  maane
zindagi bandh ankhon may na guzar jaaye
behne  de palkon se chalakte ye paimane
hasti ka  ek din neest hona  moqadar  hai
laga kyon abhi se taboot may keel lagwane
tujhe tera hone nahi denge tere paimaane
her buund hai sheesha her taraf hain aaine
hosh se begaana kar dein,hain vo begaane
bheys kis ka liya hai apnon ne khuda jaane
usey manzur gar hota vo mere rubaru  hota
meri soch ki perwaz may tu hi hai deewane

koi khwab sa lamha ................................

kabhi koi yehan per bhi rahta tha

is jadunagri ko bhi veerana kehta tha

in phulon say mehek lekar mehekta tha

husn ki is waadi may jawan rahta tha

koi khwab sa lamha socho to lagta hai

behta hua waqt zamanon may badalta hai

kya umar ka waqfa koi bichda hissa hai

guzra hua ye kal aaj mahaz ek khissa hai

subahein na jaane ab kahan gum hain

din qiston may kitnon may bat ta hai

shaam jaise udas lamhon ki sargam hai

raat ka seena kis ghum may paht ta hai

ab kahan chashm-e-saaqi tak rasaii hai

lagta hai pyaase ki jaan pe ban aai hai

takrar maye ki maye-kadey ki ruswaii hai

ishq kehta hai teri talab hi herjaii hai

ye kya hua ke yaadon per bhi pehre hain

khayalon ke zakham bhi ab ke gehre hain

in ankhon ke qaafiley kahan pe tehre hain

Zindagi may faqat tere rang sunehre hain

ye akhir mere maula daur kaisa hai

sab kuch hai phir bhi dil kaasa hai

ek usi ke naam ka dil ko dilasa hai

tere aage mera daman zara sa hai

teri yaad ka mosam...................................

lay phir agaya hai 

ek naya rang le kar

teri yaad ka mosam

mere saakt zehen-o-dil ko

hosh may laata hua paiham

mujh se duniya naraz ho to ho

sifak tha teri khamushi ka mosam

meri soch ke parr,justaju teri thi 

magar ek si apni perwaz thi baham

guzri hui sadiyon ne poocha hai

tha shab-o-roz may kahin hamara ghum

chalo safeer tum bhi,safeer hum bhi hain

aas manzil ki jub talak,mila karenge hum

zindagi sab se giran hai,tanhai ka mosam

tera hona kisi niyamat se nahi hai kum

Mai Adam.......

teri khuld se nikal kar

tere jahan se mil kar

kya kya na haath aaya

mere dono jahan ke malik

tujhe kahan kahan na maine paaya

tere hijir ka ghum keh raha hai

mai kabhi tujh se,juda ho hi na paaya

ye husn ye nazare,sab mere liye bane hain

sab se haseen tune mujhe banaya

teri ek nigah paa kar kya kya na maine paaya

duniya saza nahi hai ye raaz samajh may aaya

adam azal se junnati hai,duniya mahaz safar hai

do-jahan ke badshah ne yehi hai samjhaya

daman tahi na rakhna,wapasi ki raah takna

junnat ke baam-o-darr se paigham yehi hai aaya

khuda gawah hai,adam ka ek hi muddua hai

tere siwa dil ne qarar kahin na paaya

ye dore tujh se mere khalikh,yon bandhi hai

koi iblis,koi shaitan isko na tod paaya
jawab hun mai teri her kashmakash ka
mere hone ne malik ,tera hona samjhaya

haasil-e-safar yehi hai awal-o-akhir wahi hai

sidrat-ul-muntaha se tahat-us-sara tak tera hai saaya 

nazar-e-karam ka hai ye nazrana......

ek sanglakh chatan sa lagta hai

kabhi barf ka koi todda sa

kabhi pal may pighalta perwana

kabhi aanch dekar khud jal jaana

ankhon may ghazab ka alam hai

kitnon ka basera hai ye veeraana

per kahin aur rehta hai deewana

teri be-rukhi may bhi helawat hai

is chup se behter hai usko paa jana

ek sunnata rooh may hai utera

ya ho gaya hai ye tera veeraana

num zarkhiz zameen ho jis dil ki
waan asan hai gulon ka lag jaana
maali ko hai roghbat her us dil say
nazar-e-karam ka hai ye nazrana

Mai kahan hun in khakon may...............................

ye mai nahi hun maano tou

tum hi tum ho pehchano tou

mai kahan hun in khakon may
ye tum hi tum ho ankhon may
jo rang chura kar hum aaye hain
ye sang tumhara daman laaye hain
umar guzaari thi bandh ankhon may 
tum se hi hosh ke lamhe paaye hain
tujhe be-khudi yaad bhala ab kon kare
tujh may hi jaan meri hum doob mare
maana tha vo qismat ka ek kheil sahi
ek bunnd ka pyasi dharti se male sahi
taqdeer aksar yon bhi samjhane aati hai
jub tak chot hari hai ye tera saathi hai
haqeeqat jub khwab si lagne lagti hai
qudrat yon hi perdon ke peeche milti hai
ye kheil nasibon ka hota hai dilwalon se
rab khush hota hai aise hi matwalon se

rang-o-buu ke rasiya...................

rang-o-buu ke rasiya
rang le kar rahenge
gar haath aagaye kisi ke
phir saare rang bahenge
ab talak chor they sipahi
ab kis aad may chupenge
zara daman bacha ke chalna
daagh dil ke chut na sakenge
shauq inka lamhon ka kheil hai
kisi daal per do pal nahi rukenge
in waqfon ki kahani mokhtasar hai
laikin inhi may ye sadiyan jiyenge
ye farakh-dil humwatan hain,kahenge
hum jahan hain hamare rasya rahenge
baad muddat ke haath aaya hai mosam
jo hum ko mila hai dete huye chalenge

kya chahata hai aye dil....

ek sakta hai ke taari hai

her lamha soch per bhari hai
--------------------------------------
Us ne aye dil kahan socha tha
khud boye they shajar jo usne
saayon ko tarsaayenge ek din
roz khilti in konpalon ke sang
khud ko jawan hote dekha tha
sarsabz hote khwab kehte they
ye andaz tumhari amanat hain
tumhari taabir ban ke lautenge
na ke tumhare khwab lootenge
yaqeen perwan ka dekhiye saheb
ke jaane waale kabhi to lautenge
maana dastur dil lagane ka naqis hai
magar saheb kahan hum se chootenge
her subah ka yarab yehi arman hai
hamari tarha ye kabhi na tutenge

ye duniya naii naii hai...

ye duniya naii naii hai
yehan shanasa koi nahi hai
jo le kar chale they,carvan-e-ulfat
unhein tahi damani ka,shikwa nahi hai
hum jis safar per maan se chale they
uski rahguzar ka, nishan kyon nahi hai
ye ja baja jo sar hain, katey huye hain
Jo sar utha hua tha,vo ab raha nahi hai
khair mere yarab,dil badal gaye hain
kya ab dilon may, tera basar nahi hai
mohabbat aaina hai,rabubiyet ka
Aah! khudparasti,tera aks koi nahi hai
maana aye dil,dhoke bade haseen hain
luzat-kashi se behter,koi jahad nahi hai
besood talaash ka,haasil bas yehi hai
shab-o-roz may ab,dil kahin nahi hai
aye kaash zindagi tu,sirf khwab hoti
shab bhar ka sauda bura to nahi hai 
hosh ne sah ke zalim,zabt ye sikhaya
khamoshi se behter aah-o-baka nahi hai
kaash jaan meri, waqt rahte jaan paao
jo tum se tuta,vo mahaz mera dil nahi hai
waan tha,mere rab ki takhlikh ka basera
pehchan kar bhi khud ko pehchana nahi hai
hikmat ke khel saare,kaam agaye hamaare
ab dil se hamare kuch bhi chupa nahi hai

mujhe bhulne waale.....

mujhe bhulne waale
mai tere dil se na jaungi
tu jitna bhulna chahe
mai rah rah kar yaad aungi
mai kahan door hun tujh se
teri ankh may jhilmilaungi
teri dum todti muskurahat may
aah ban ke kulbulaungi
siyah raat ka jaise koi jugnu 
tere khayalon may jagmagaungi
tu chahe na chahe kya ghum hai
mai meri jaan tujh ko chahungi
lafzon may na jo jhalkey
teri aisi tasveer banaungi
mai tujh ko yaad karte karte 
khud ko ek din bhul jaungi
maana tu saaya hai soch ka meri
mai perde utha kar milne aungi
gawah rahna ye tadap tujhi se hai
ye na rahi mai bhi rah na paungi